Sidaamu Dagoomu Qoqqowi Mootimma Loosu Dandootenna Interprayizootu Latishshi Biiro Dandootenna Interprayizootu Irko Handaarinna Ogimmate Dandoo Buuxo Ejense 2015 M.Diri 10 Agani Loosu Rippoorte Shiqqeenna Hasaawa Assitinno.
Hasaawu aana leeltinoti Sidaamu qoqqowi loosu dandootenna interprayizootu latishshi biiro sooreette dukko Hageretsiyoon Abbebeti tekiniketenna ogimmate kolleejjuwa dandootenna egennotenni ikkadda ikkino qansicha kalaqate noonsa qeechi jawa ikkasi kulte, qajeelsiisatenna qajeelate harinsho garunninna wodho agartinota assatenni loosa agartannota xawissino.
Dukko Hageretsiyoon Dandootenna interprayizootu irko handaarinna ogimmate dandoo buuxo ejensenni shiqqino rippoorte laisse coyidhanni, diroho amandoonni mixo garinni woyyino loossa loosantanni nootanna rippoortete giddo xe'ne ikkite ka'u hedo aana seekine hasaawatenni sunfe qaafo adha agartannota xawissino.
Tayixe diro haaro qajeelaano adhate widoonni, keenatenna meyaa qajeelaano ikkadimma gotti assate ragaanni noo mitiimma halamme tira hasiissanno yitinno.
Sidaamu qoqqowi loosu dandootenna interprayizootu biiro 2kki sooreessinna Dandootenna interprayizootu irko handaari sooreessi kalaa Fiissi Fichoolihu ogimmatenni ikkadda ikkinonna gobbate deerrinni hettisamaancho ikkino qansicha kalaqate illacha tunge loonsanni hee'noonnita coyirino.
Sidaamu qoqqowi ogimmate dandoo buuxo ejensehu qaru dayirektere kalaa Kanchulli Kambehu haammata uurrinshuwa ledo sheemaate eatenni keenamaanote ikkadimma keente ogimmate dandoo buuxo sertefikeete uyitanni keeshshitinota kule, tayixe dirono 44 uurrinshuwa ledo sheemaate e'e loossanni afantannota xawisino.
Hasaawu beeqqaanono rippoortetenni shiqqino laafa midaadi aana uyinoonninsa qeecha ikkadimmatenni fulatenni jawaata assate loossannota xawissino.